PYC nakisumaro sa VYC Camp

An Parish Youth Council (PYC), implementing-body kan Commission on Youth san Parokya ni San Antonio de Padua, naging saro sa mga representantes san Youth Camp na inorganisa san Vicarial Youth Council (VYC) sa St. Lawrence the Deacon Parish, Pto. Diaz, Sorsogon, san naka-aging Mayo 5-8, 2011.

An nasabing aktibidades na may temang, “Remembering... Responding... Rejoicing......”, pig-partesiparan san mga kabataan hale sa iba-iba na parokya sa Vicariado ni San Antonio de Padua; 27 hale sa satuyang Parokya (St. Anthony of Padua), 32 hale sa St. Lawrence the Deacon-Quasi Parish (Bagacay), 15 hale sa St. Joseph Parish (Barcelona), 20 hale sa St. Lawrence the Deacon Parish (Pto. Diaz), asin 29 hale sa St. James the Greater Parish (Bulusan). Mamundo na dire naka-padara ki representantes an Paroya ni San Nicolas Tolentino (Bentuco). An mga naging facilitators, iyo an mga opisyales asin nagkapirang pili na miyembro san Vicarial Youth Council sa pangunguna sa mahigos na Vicarial Youth Coordinator na si Christie Camposano asin Youth Leader na si Arjel Randolf Rivera.

Maski ngani mauran-uran katakod san bagyong Bebeng, ine deri naging kaulangan para maki-sumaro an nasabing mga kabataan sa iba-iba na aktibidades sa nasabing VYC Camp. Sa pangunguna san mahigos na Parish Youth Leader san Paroya ni San Antonio de Padua, Jhay-R Soledad, nagkamay-on sira tsansa na makila asin maka-ulayan an kanira mga kapwa kabataan magpoon sa opening asin “getting-to-know-each-other” activity san Day 1 hanggang san “awarding” san Day 4 (Last Camp Day).

Nagparada man an mga kabataan na ine sa palibot san poblacion kan munisipyo san Pto. Diaz asin pinuno sin ribok san kanira “group yell” an tinampo kan nasabing banwa.

Nagkamay-on man sira sin saro na makusog na “bonding moment” sa paagi sin pagpatiribayan sa simultaneous games (sack race, centipede, egg roll, touch the color, ball & yarn relay, asin “dos por dos”). Naimod man an kanira talento sa mga kontes parehas kan essay, poster-making, body-painting, asin souvenir-making, kun saen inuli ni Rizza Pineda (PYC member an 1st place). Panduwa man si Christian Jemir Paje asin partner niya na si Mervin Felecia sa Body-Painting Contest.

Naging parte man an gabos na participants hale sa PYC sa saro na pagtatanghal san “ginubat festival” bilang presentasyon kan kanira delegasyon sa “cultural & talent showcase” na ginibo sa pang-urhi na gab-i san nasabing aktibidades; kun saen an kada parokya san Vicariate nagpa-imod san kasaysayan kun pan-o nabuo an kanira parokya/banwa.

Naghatag man sinda kan maogmang pagsimbag sa pangapudan kan simbahan sa paagi san pagbati san mga ideya hale sa nagkapira na speakers parehas ni Rev. Fr. Ernie Mendina (Diocesan Youth Director), Rev. Fr. Noel Listana, Mrs, Veronica Gallanosa, asin Rev. Fr. Edu Fulay. Nagselebrar man sira sin Eukaristiya sa panguna kan Vicarial Youth Director, Rev. Fr. Patricio Alcantara

Maski ngani medyo frustrated kay deri natuloy an “extra challenge” (dahil sa bagyong Bebeng) kun saen ma-hiking kunta pakadto asin masulod sa pamosong “Nagsurok Cave”, maogma man gihapon na nagtapos an nasabing aktibidades.

(kuripsaw 05-15-2011)

Tsinelas, pinamudmod sa Nazareno

Dakulaon an pasasalamat san mga saragday na aki san Nazareno Elementary School, Nazareno, Gubat, Sorsogon matapos na sinda mabiyayan san mga tsinelas na itinao san sayo na anonymous donor “through channel” san mabooton na Parish Youth Director, Rev. Fr. Vernon Zuleta kan naka-aging January 9, 2011.

An nasabing gift-giving project, isinabay sa selebrasyon kan Kapistahan kan Poong Nazareno sa nabanggit na Kapilya.

Apwera san mga tsinelas, an mga aki nakaresibe man sin diyot na regalo asin pagkaon na inihanda san mga miyembro san Rizal KPC sa pamumuno ni Ms. Edith Encinares.

Presenti man para magtabang sa nasabing aktibidades an mga opisyales san Parish Youth Council sa pangunguna kan Parish Youth Coordinator na si Arjel Randolf Rivera asin san bagong elehir na Parish Youth Leader na si Bernardo E. Soledad Jr. asin man an dating Youth Coordinator na si Dennis Hubilla.

PARISH YOUTH DAY asin WALK for JESUS, pigselebrar

Sabay na pigselebrar kan Commission on Youth san Parokya ni San Antonio de Padua an Walk for Jesus asin an taon-taon na Parish Youth Day kan naka-aging Disyembre 18-19, 2010 sa Parish Lay Formation Center asin Gubat North Central School compound.

May temang “KABATAAN ni SAN ANTONIO: Susog sa Misyon san KRISTIYANISMO”, laom kan nasabing aktibidades na magkamay-on sin panibagong ispiritual na eksperyensa an kabataang Gubatnon na magdadara sa kanira sa padagos na paglaom na maging mapagkumbabang paraserbi kan saindang kapwa kabataan susog sa ehemplong itinukdo niHesukristo.

Nagbatog an aktibidades na hapon kan Disyembre 18 sa paagi sin halip-ot na programa kun saen pinugkutan an Parish Youth Council torch asin sabay-sabay na itinaas san mga Cluster Youth Leaders an kanira delegation/color flag.

Nagkamay-on sin kumpetisyon sa manlaen-laen na traditional Filipino games parehas san patintero, karera kan sako, nan iba pa. Ine maogmang pig-intrahan san mga partisipantes hale sa iba-iba na Kapilya Youth Ministries san Clusters 1-VI asin mga iba-iba na Campus Youth Ministries asin religious youth organizations san parokya.

Katakod kaine, asin bilang pakisumaro sa simultaneous activity kan Diocese of Sorsogon na Walk for Jesus, nagkamay-on man sin torch parade an mga partisipantes sa palibot san poblacion kan Gubat. Habang naglalakaw, sinda nangadyi kan Santo Rosaryo na pinangunahan san Youth Leaders san iba-iba na Clusters nan san mga opisyales kan Parish Youth Council.

Nag-atendir man sinda kan Simbang Gabi sa parokya asin nagkamay-on sin programa para sa socialization.

Pinadagos an Championship games sa kaagahon san Disyembre 19. Nagkamay-on man san eleksyon para sa 2011 Parish Youth Council core group. Nagtapos an aktibidades sa halip-ot na programa.

An aktibidades naging matriumpo sa paagi san pagdaranonan san gabos na opisyales kan PYC sa pamumuno kan mahigos na Parish Youth Director na si Rev. Fr. Vernon Zulueta asin Parish Youth Coordinator na si Arjel Randolf Rivera.